品質國際（243）全周整咗個靚仔三角旗，加埋兩大理由，夠晒炒。品質06年度（4月止）虧損大幅減少，減至2500萬銀（05年度大出血2.7億銀），有止血迹象。要咁睇，商品銅價上年狂升，影響到品質下家客戶需求。但踏入品質嘅07年度，期銅由高位8800蚊美金回落，呢幾日兼且跌穿7000蚊美金。銅價回落，加強品質業績見底機會，可炒復蘇。
再講，呢期媒體又傳出，品質有意出售旗下聯營樂依文（控42.42%）消息。姑勿論堅定流，計計數，上個月以嚟，阿仔樂依文，唔經唔覺勁升近3倍，而品質應佔市值約莫3.26億港銀，相當於品質每股0.425元，係品質現價（0.81元）52%，潛在套現及回撥數額相當豐厚。上星期五，品質已經貼近旗形之阻力，一旦破位，量度升幅目標1.02元，現價潛在升幅幾乎30%。

莊中實質折讓7成

莊士中國（298）最新NAV1.18元，現價（0.445元）折讓62%，加埋集團揸住上2000萬平方呎土儲，重估增值後NAV起碼睇1.5元，實質折讓可以去到70%或以上，好抵買。
呢期中資內地房產股狂升，連一向落後嘅純港資新世界中國（917）都開車，創5年新高，有理由相信，遲早到莊中。睇番當年科網潮，狂牛駕到，莊中就由99年尾開波，狂升3倍先見頂。呢潮港股狂牛確認，買莊中，起碼博一個開先考慮獲利。
錢雋