警隊「二哥」副處長任達榮退休，噚日主持任內最後一次警校畢業典禮，會場星光熠熠，多位已退休警隊高層都有嚟捧場，仲有位真正星級人物出現，就係任達榮細佬任達華。
華哥主演嘅《歲月神偷》揚威柏林，噚日到場時頓成焦點，佢仲同埋太太琦琦、女兒一齊捧場見證阿哥榮休。華哥從影多次做警察角色，《PTU》中飾演外冷內熱警官入木三分，據講有舖頭貼出佢張海報，當做紙板警察「兇」蠱惑仔，可見華哥警察形象幾咁深入民心，噚日入到警校，同一班阿Sir企埋一齊，果然入型入格，真係抵佢攞獎。鍾情攝影嘅華哥仲帶埋私伙相機影相，儀式完結後，兩兄弟一家人大合照，場面溫馨。

勉勵80後警察

喺警隊工作近38年，任達榮心情看來依依不捨，同合作多年同袍握手道別時，情緒有啲激動，已退休嘅前一哥李明逵都有到場。任達榮話感謝警隊多年栽培及同僚支持，做警察令佢感到自豪同滿足。講到當差難忘經歷，佢話係90年代初借調到英國交流嘅一段日子，因為要處理球迷暴動事件。
臨別贈言，任達榮勉勵新紮師兄、師姐要保持正直、誠信品格，朝正確方向行事。近年警員犯案時有發生，警隊形象受損，任達榮提醒呢班剛出學堂80後警員要保持淡泊心境，審慎交友，對生活紀律要有嚴格要求，處事要腳踏實地，工作唔好斤斤計較，亦唔好以為警校畢業就好輕鬆，應該喺工作中吸取經驗，提升專業水平。
阿Sir苦口婆心，再贈多六句共24字真言畀警校畢業生，「發上等願，結中等緣，享下等福，擇高處立，尋平處坐，向寬處行。」八方見好多大Sir聽到點晒頭，希望新紮師兄、師姐都聽得入耳啦。部份警隊高層退休後下海搵真銀，任達榮坦言無意做其他工作，退休後最想多啲時間享受家庭生活，飲飲食食，嘆吓世界就最啱佢嘞。
mailto:[email protected]