自從2011年維港渡海泳復辦，每年10月都有幾千人齊齊游水過海，何其壯觀。噚日就有泳手疑似提早足足半年率先試水...咪住先，咁多毛嘅？

有網民噚日喺西環碼頭吹風影靚相之際，突然發現呢位泳姿矯健嘅「野豬界歐鎧淳」，一臉悠然自得游向岸邊，輕輕鬆鬆，睇嚟好有經驗，完全無視碼頭邊舉機影相拍片、興奮到嘩嘩聲嘅遊人。

野豬喺堅尼地城海傍搵到個位登陸，一上岸就貌似肚餓，走嚟走去搵好嘢食。警察接報到場都唔敢輕舉妄動，只係攞盾牌包圍，點知嚇親呢位成身濕晒嘅遊客，急急腳橫過城西道，去卑路乍灣公園散步，途經巴士、私家車都要收慢避開，可憐警察叔叔跟到索晒氣，直到夜晚9點野豬先至「落網」，由漁護署人員運走。

呢隻冇獠牙嘅野豬仲好親民，同西環街坊幾乎近距離擦身而過都仍然超淡定，又冇搶嘢食，又冇拔足狂奔撞人，街坊讚佢乖添呀，不過亦有女士獨具慧眼，大嗌「呢隻黑毛豬嚟㗎」。不過提提大家，野豬幾乖都始終具有攻擊性，幾想摸、幾手多都要忍住呀。