當年今日

個唱戴十隻龍鳳鈪威過結婚
彭羚性感雲雀嚇傻林海峰

蘋果日報 2002/01/27 00:00


彭羚前晚在紅館演出首場個唱,她穿着多套性感羽毛裝,其中包括低胸大露背,看得其夫婿林海峰忍不住大歎驚險。Cass前晚又緊張得頻甩嘴,更遺失了兩隻龍鳳鈪。
彭羚(Cass)在紅館舉行的一連兩場「CassTheCity演唱會」前晚開鑼,Cass整晚所穿的六套衫都頗性感,包括吊帶低胸裝、大露背裝及超短裙等,連Cass的老公、座上客之一的林海峰(Jan)都大喊「緊張過張柏芝飛車」,其他捧場客包括黎瑞恩、許志安和寇鴻萍等。
Cass表示對全晚的服裝相當滿意,問她着超短褲時有否打底?她說:「大部分都冇打底㗎,啲人話叫我扮雀仔唱歌嘛,我咪件件衫都有羽毛囉。」

老公語無倫次
而Cass的老公阿Jan前晚與林夕坐在觀眾席上靜靜欣賞老婆演出,完騷後他表示給老婆一百分。問阿Jan會否覺得Cass個唱的衣着太性感?他說:「幾好呀,隊北京管弦樂團幾好。」再問阿Jan覺得老婆的服裝好不好看?他笑說:「之前冇睇過,鑽石bra佢鍾意咪得囉,身形好好呀,個大提琴。」
問阿Jan會否怕老婆走光?他說:「我戥佢驚險就真,緊張過柏芝飛車,好睇過《哈利波特》,戥啲衫驚險呀!」

甩嘴忘記歌詞
此外,Cass前晚請來黃貫中及黃耀明任嘉賓,但Cass因過分緊張致頻頻甩嘴及唱錯歌詞,後來她走到老公面前唱歌,她看見阿Jan後又緊張地走開。完場後Cass發覺她手上佩戴的十隻龍鳳鈪有兩隻不見了,她說:「啲鈪係贊助㗎,我應該戴十隻出場,唱唱吓發現少咗兩隻,唔知係趕唔切戴定係跌咗?我結婚時都冇戴過龍鳳鈪呀!」
採訪:李珮洳 攝影:陳偉權