【未決賽先跑出？】一肥一靚出奇地夾 姜濤孖梁業變「特務」完勝

蘋果日報 2018/09/09 21:00

全民造星梁業姜濤肥姜
    ViuTV準備喺《Good Night Show 全民造星》揀蟀打造新男團，雖然一切仲要等下個月決賽之後先成事，但估唔到比賽途中已經成功打造出一個二人最強組合「肥姜」出嚟。
    「肥姜」就係肥仔梁業加靚仔姜濤，佢哋所屬B組導師卓韻芝同郭偉亮（Eric Kwok）等，派咗肥仔同姜濤出戰對撼A組龍志權、Anson Kong（江熚生）、同細貓（應智越）等以歌舞演繹《誰令你心痴》及《最後一夜》。「肥姜」今次以搞笑形式扮特務用歌舞演繹《特務肥姜》，原本姜濤對個演出好抗拒，覺得太少時間練習，好難做得到，搞到俾導師卓韻芝捉住訓話，後來肥仔同排舞師花咗一晚時間成功游說姜濤。
    結果呢？原來姜濤唔止靚仔同唱得，佢仲相當有搞笑天份，比賽當日，佢同肥仔呢「肥姜」搞鬼組合勁夾，佢哋唔單止又唱又跳又做戲，跳舞勁掂嘅肥仔仲將姜濤抱起嚟揈，睇得人相當開心。完場後姜濤仲搞鬼向評判畢書盡話：「我偷咗樣嘢畀你。」然後好鬼馬咁向畢書盡派心心，全場人士笑爆嘴，而最後呢個肥姜組合勝出。
    其實目前播緊20強淘汰賽，A、B組兩隊學員比賽分五輪對決進行，每輪比賽勝出一方將會為所屬組別贏取2個出線名額。五輪比賽結束後，兩隊導師將會應贏取嘅出線名額揀選學員進入10強。首輪比賽，A組派出學員Stanley（邱士縉）、Anson Kong、細貓等以現代舞演繹王菀之嘅《我真的受傷了》，但就輸咗畀B組總動員出動組成籃球隊以歌舞演繹Twins嘅《男兒當入樽》，由B組攞到首兩個出線名額，而之後「肥姜」又贏咗，再成功攞到兩個名額。
    精選娛聞，喺晒《娛果》
    http://fb.com/appledailyent
    empty
    姜濤同肥仔組成最強「肥姜」組合。
    empty
    兩個扮特務又唱又跳。
    empty
    仲做埋戲㗎。
    empty
    肥仔將姜濤抱起嚟揈。
    empty
    跳舞勁掂嘅肥仔表演難度動作。
    empty
    姜濤突然搞鬼向評判派心。
    empty
    Anson Kong呢隊扮哥哥唱歌輸咗畀姜濤同肥仔。