市場信心仍弱，央行放水憧憬變成出貨大會，大戶散戶爭相將蟹貨掟出，形成一彈就散的格局。
阿爺放風減息唔夠一日，又有報道指通脹壓力未紓緩，最快都要下季先有得減，但昨晚突然又減息，真係玩死人。
如此市況，有本事反地心吸力炒上，非消息股莫屬，好似廣州藥業（874），自收購白雲山藥業及奪回王老吉品牌經營權後，股價扶搖直上，3月底復牌後爆升一倍，而下一隻潛力股可能係金威啤酒（124）。
今年1月底，金威公佈正與獨立買家商討，出售釀酒及分銷啤酒業務，華創（291）、北控（392）旗下燕京及百威均傳有出價競購。事實上，金威去年先賺3477萬銀，PE過百倍，手頭現金又唔多，何解咁搶手？
金威最值錢之處為其市佔率，在原產地深圳稱冠，在廣東亦排第三，而華創及燕京在華南地區的市佔率一直處於劣勢，誰爭贏對手奪得金威，將大幅提升於華南的業務實力，故相信雙方出價將相當進取。
近日大市反覆尋底，但金威股價節節上揚，走勢與市況脫鈎，反映收購或已有突破！再睇華創股價低位連彈兩日，走勢較北控強，唔排除已有春江鴨掃貨，但論最終贏家，非金威莫屬。

魏力
http://www.facebook.com/2012jason