「五迷」持久戰真係有排打，一早要面對排隊黨，等到早上10點系統故障，要十點半再開賣，早上10點33分左右，工作人員派完籌，職員先俾頭4位南亞裔人士，同埋跟隊後嘅6位大陸fans，安排10個入內，點知等咗個幾鐘，啲南亞裔人士更忽然撤退。

排「頭位」疑似南亞裔嘅女士喺今早9點幾接受訪問時，被問買咩飛時，並冇回應，再問佢係唔係買劉德華嘅飛，佢話：「Yes!」被問排咗幾多日，呢位女士起初話排咗5日，之後又話自己排咗一個禮拜，講到知唔知邊個係Andy Lau、係唔係fans， 呢位女士冇再出聲，只係話唔識英文。

中午12點12分左右，見排「頭位」疑似南亞裔嘅女士步出，佢聲稱一陣再返嚟，南亞女士話下午2點先返嚟，等唔到開賣就走咗。

另一南亞裔男子於早上11點半左右步出通利，被問係唔係買咗飛，佢話：「No!No!No!」之後走咗去，工作人員表示當時個系統係未開賣，只係嗰位先生趕時間走先。

此外，見疑似南亞排隊黨嘅阿頭「監場」，喺另一邊門入咗去，上咗二樓疑似收飛，另一個疑似南亞阿頭則企喺尖沙嘴通利門口睇住啲南亞裔人士排隊情況。

尖沙嘴通利職員指尖沙嘴購票站仍未開賣五月天個唱門票；同時Cityline售票網fb亦留言：「所有售票渠道 (包括網上、電話、售票處及APPS)的公開發售時間將為今天中午12時45分。不便之處，敬請見諒!」