葉劉淑儀喺亞視做嘅訪問節目《葉劉博客》，收視率慘敗，只得三點以下，活力先生話葉劉冇電視主持風格，硬繃繃，收視率敗也固宜。一位消息人士就話，亞視慣性收視率素來好低，《葉劉博客》之前嘅電視劇收視率都係只有三點五左右啫，根本完全冇法子貼近無綫，弱勢台全無還手之力。
與無綫硬碰硬就死梗啦，搞另類節目，與無綫走不同路線就或者有一條生路。譬如無綫講容祖兒，亞視就講宋祖英，開發高檔市場，得唔得呢？消息人士話亞視唔敢噃，因為如果無綫行北線亞視行南線，無綫走向東，亞視走向西嘅話，即使有另類觀眾，收視率冇法子反映出嚟，變成白做。

原來量度收視率嘅方法，可說三十年來不變，極之陳舊，就係倚靠六百部盒機，裝在電視頂，觀眾一轉台，盒機就會記錄，純以呢六百個家庭而言，收視準確性係百分之百，但呢六百個家庭嘅分配，是否可以代表香港二百萬以上嘅家庭橫切面（crosssection），有得拗。左丁山好耐好耐以前被隨機抽樣抽中為六百個家庭之一，立即一口拒絕，自己所有識得嘅朋友之中，冇一個嘅家中電視機裝咗收視監察機。換句話講，左丁山懷疑目前嘅收視率調查嚴重向公屋居民品味傾斜，如果亞視走精緻文化路線，在現行收視率調查方法之下，亞視輸得重慘。
到咗○七年尾，本港電視走入數碼時代，無綫亞視各有六個頻道，呢兩個電視台如何填滿頻道二十四小時，相信幾花腦筋，到時我哋計埋無綫、亞視、有線、NOW，數數埋埋有近幾十至一百個台可以收睇，選擇就多嘞，但如果量度收視率嘅方法唔可以改進嘅話，大贏家仍然會係無綫翡翠台。
收視率與我哋觀眾無關，但關乎兩個免費台嘅商業生命，亞視輸到執笠嘅話，對香港冇好處。