劉嘉玲同謝君豪將於下月演出舞台劇《奪命證人》，今日佢哋喺商台接受訪問，謝君豪透露現時已排咗一半，進度都ok。係咪冇難度？佢笑住話：「個個戲都有難度，神仙咩！Paul哥（秦沛）好犀利，喺電影入面飾演咗好多次律師，今次手到拿來，連排戲都著住律師袍。」謝君豪喺劇中飾演殺人嫌疑犯，佢話：「我係無辜，我好純潔，好錫老婆，又顧家，啱晒我做，冇難度。」點知嘉玲即刻話：「你平時都唔係咁，係有一定有難度嘅。」

喺劇中，嘉玲同謝君豪飾演夫妻，兩人會有親熱戲，嘉玲話：「呢段戲未排，如果要做《色戒》，我都可以，有咩問題，你哋大驚小怪！」就連身旁嘅謝君豪都忍唔住「嘩」一聲。講到親熱程度，謝君豪表示會有幻想空間，嘉玲就話：「總之可以畀你感覺我係好愛佢，唔能夠冇咗佢。」

對於有報道指Paul哥因爲感到壓力而要食鎮靜劑，問到嘉玲當年首次演舞台劇，有否遇過類似情況？佢話：「壓力o依家都有，瞓覺唔夠熟睡，成日諗可唔可以試下用另一種方法，呢個狀態要做完舞台劇為止。」再合作，默契多咗？嘉玲指：「佢（謝君豪）係我老師，我會私下問佢，因為毛Sir（毛俊輝）比較嚴肅。」嘉玲更透露老公梁朝偉會睇佢演出同睇佢綵排，係咪睇綵排親熱嗰場戲？佢話：「排好先叫佢睇！」

講到梁朝偉約滿澤東電影公司，結束經理人關係，嘉玲現時暫代偉仔嘅經理人一職，嘉玲噚日喺微博張貼偉仔「beach boy」背影相，有網民讚嘉玲係「最佳經理人」，嘉玲話：「我耐唔耐就會post佢啲嘢，我唔係經理人，係佢嘅聯絡人，我都唔忙，佢啲嘢好簡單，佢冇乜嘢做。」嘉玲指偉仔約滿澤東，暫未搵到新經理人，所以由佢暫代，佢話：「我打理自己嘅工作20年，我做經理人非常勝任。」怕唔怕會有拗撬？佢表示：「應該唔會，喺生活上、工作上，大家一齊30年，我好了解佢嘅脾性，咩適合佢做，可能佢覺得我有安全感。」有人提議偉仔多接工作，嘉玲笑住話：「我唔會，我會收埋佢，如果遇到適合工作，我會游說佢，我都想佢演舞台劇，所以叫佢嚟睇綵排，如果佢同謝君豪合作，會有新鮮感。」

精選娛聞，喺晒《娛果》
http://fb.com/appledailyent