按揭代理界群雄割據，鬥現金回贈亦鬥服務，大戰正酣之際，有「按揭界美女」之稱嘅經絡按揭轉介代言人劉圓圓（Sharmaine）竟然喺今個月底離任，仲要係裸辭，同公司結束12年賓主關係。

華華打畀Sharmaine問，佢都坦承自己會離開經絡，但就未有下一站，只係話抖下先，「真係未有計劃，所有嘢都有可能，你有筍工都可以介紹畀我架」。

提到公司，佢話唔捨得，但決心離開comfort zone，不過未來對於business development呢項工作仲有興趣，亦唔抗拒金融科技公司。

睇翻資料，Sharmaine喺加拿大多倫多大學畢業，曾經喺亞視擔任靚女主播，其後加盟經絡，一做就12年。雖然仲有2星期左右先離職，不過佢話期間都無大型新盤推出，所以未必有機會再公開亮相喇。

不過按揭界美女人才輩出，行家多不勝數，不過近排異軍突起嘅，必定要數「苟姑娘」苟芸慧用唔鹹唔淡嘅中文，幫星之谷按揭做代言人。