高太的愛情轟烈又動人，年輕時與高錕私奔結婚，結婚後放棄事業成就丈夫，高錕患病後寸步不離照顧至終老。對於晚年因病「返老還童」的丈夫，她說照顧不算太辛苦，平日會讓他寫字訓練大腦，「大baby（指高錕）肯鼓勵佢都自己肯做，好合作，乖嘅BABY，容易湊」。

訪問在中文大學聯合書院進行，會客室內剛巧有高錕年輕時的照片。記者問高太：「教授後生係咪好靚仔？」她笑咪咪地回答：「係囉，係靚仔先入我眼，佢依家都好靚仔，無乜改變，五官30年都冇改變。」高太的眼中，仍然有着對丈夫滿滿的愛意。

2004年高錕確診腦退化症，與病共存14年，一切有賴高太無微不至的照顧，當中她承受的壓力可想而知，「最辛苦是早、中期，佢（高錕）唔明白點解佢有問題，點解個世界咁亂，佢自己無信心」，高太指，最重要是了解患者，「唔了解佢嘅話，佢發脾氣你又發脾氣，又嗌交，兩邊都唔開心同辛苦」。

作為過來人，照顧腦退化患者，全是學習過程，「嗰時我都唔明，只係知佢嬲，唔明佢嬲自己，以為佢嬲我，咁我又嬲佢，依啲時期好辛苦」。後來照顧上手日漸熟手，高教授也算是合作的病人，高太指，到病情晚期時，雖然丈夫已不善言辭，亦失去活動能力，但已經相對「易湊」。

高錕其實很聽話。高太透露，他晚年留鬚全因她不願為他剃鬚，「佢年紀大要一日（剃鬚）兩次喎，上晝一次，下晝三四點又要批‧‧‧佢自己批又miss，又係要我同佢批‧‧‧我咪叫佢留鬚啦，佢又好合作話好」。對於照顧腦退化患者，高太認為生活質素必須維持，「要好多人去探佢，需要過生活，唔好畀佢覺得自己無用‧‧‧still human，唔好歧視佢」。

記者 嚴敏慧