現年51歲的黎明（Leon）失婚六年，隨着前妻樂基兒去年再嫁圈外男友Ian，回復「單身筍盤」的他鮮傳緋聞。不過，上周忽然有周刊爆料，指他和A Music女員工Wing譜「父女戀」，昨日更驚爆Wing現時已陀B六個月，準備生狗B。對於前夫傳快做老豆，樂基兒大方為他送祝福：「So happy for them.」

隨着郭富城去年迎娶國產嫩模方媛，城嫂為她誕下得意B女，四大天王中，只剩失婚六年的黎明（Leon）仍然是「單身筍盤」。不過，繼上星期周刊爆料，指Leon原來早於去年已告別單身，和32歲A Music職員Wing暗譜「父女戀」，昨日再驚傳Wing已陀「明種」六個月，預產期於今年年中。

傳懷「明種」的Wing，11年加入A Music時只是普通藝人助理，七年間躍升為營業部經理，昨日出版的周刊，影到腹大便便，似已懷孕六個月的Wing駕駛Leon公司名下私家車到沙田shopping，穿上一身名牌新裝的她，行完家品店再看BB床，之後再去車行睇七人車，如同貴婦出巡，shopping後再駕車直接返回Leon上水豪宅。

由於Leon過往的緋聞女友包括舒淇、李嘉欣等，以至前妻樂基兒（Gaile）皆屬高質數，故不少網民皆對他忽然「轉口味」大感錯愕，加上Wing被指人緣極差且機心重，又曾傳為李治廷離婚，故「父女戀」消息傳出即震撼中港台三地。Leon前妻樂基兒接受本報訪問，仍大方為前夫送上祝福，祝他幸福。Gaile透過短訊以英文回覆：「congratulations and so happy for them. They deserve everyone's blessing and all the best.（恭喜，後替他們開心，他們值得所有人的祝福，祝他們一切順利。）」

Leon老友雷頌德（Mark）昨日在葵涌出席藝術展開幕，對於Leon一次過被爆有女友兼疑似快做老豆，Mark回應：「我真係唔知，唔係守口如瓶，你哋要問番佢本人。」有關Leon和Wing拍拖，以及是否在A Music打晒骰？Mark同樣表示不知情：「我真係唔知，我係識Wing，有一齊合作過，佢以前負責李治廷、Janice同JW，不過最近冇見。」

問Mark聽到Leon疑似快做老豆可感驚訝？Mark表示：「如果係真嘅，唔會驚訝！邊個朋友都會恭喜。」但問到Mark會否致電Leon講恭喜，他則說不敢：「我唔敢呀，如果我喺出面聽完啲嘢又去問佢，佢會唔鍾意。」關於與Wing譜「父女戀」一事，過去一星期Leon未有作出任何回應，但下周一他將會以娛樂大使身份出席活動，屆時誓必成為追訪對象。