萬人迷碧咸(DavidBeckham),上年同馬莎百貨簽約設計童裝DB07。因為英國嘅師奶好冧碧咸,所以連帶DB07都賣個滿堂紅。DB07嘅○三年秋冬季童裝,喺下個月就面世,批衫嘅最新廣告,日前喺英國雜誌曝光。不過我羅拉睇番啲衫,來來去去似乎又係咁上下,冇乜咁特別,我真係懷疑啲媽咪今年肯唔肯畀錢再買。
DB07嘅最新廣告,據講喺上個月拍。馬莎為咗就番碧咸踢波,重請晒成支攝影隊飛過去馬德里影相。
落足心機設計
碧咸賣花讚花香,猛話擺咗好多心機落去設計,但係佢嘅創作靈感係乜呢?碧咸話:「我好鍾意BaggyLook,平時最鍾意着闊身牛仔褲襯背心,啲細路着呢種衫就最好睇!如果我着得落DB07的話,我實着㗎!」此外,有份構思廣告概念嘅碧咸話,因為佢太鍾意R&B同hiphop音樂,所以今個廣告特登揀馬德里市郊一處通牆都係塗鴉嘅地方取景囉!