【終於告一段落】屈朴有天性侵女子今移交檢方
蘋果韓國香港朴有煥朴有天即時
韓國男團JYJ成員朴有天今年6月先後捲入四宗性侵案,事件擾攘佢多時,雖然最終經警方調查後,證實朴有天冇嫌疑,但事件都搞到朴有天嘅形象勁跌。
由於警方調查時發現首名原告、24歲嘅李姓女子誣告同勒索,所以日前警方已申請將李姓女子、其男友以及其有黑道背景嘅表哥拘留令,早前首爾江南警署亦以誣告敲詐罪拘留咗第一個舉報朴有天性侵嘅李姓女子同埋佢嘅表哥。而今早警方已將李姓女子移交畀檢方,而其表哥及男友亦同樣以涉嫌恐嚇未遂移交畀檢方,警方亦正式結束兩個多月嘅調查,呢宗性侵案亦總算告一段落。
另外,朴有天嘅胞弟朴有煥日前亦遭前女友提出「事實婚姻破裂」嘅賠償訴訟,表示之前跟朴有煥係同居關係,屬於事實婚姻,不過朴有煥單方面終止二人關係,因此女方要求精神上以及物質上嘅賠償,而宋件今日就首次展開調停。據了解朴有煥將會現身上庭,同時佢亦都聘請咗幫哥哥嘅同一位律師。