淫照風波凸顯香港淫褻條例不合時宜，商務及經濟發展局局長馬時亨急急話要檢討法例，佢太太王培琪反應仲快，上星期四喺會展舉行咗個「公義之聲」大會，集合2,000幾人聲討淫照禍港，帶頭為香港禱告，可能想幫香港洗脫「淫照港」污名。

基督徒聲討淫照風波

馬太係虔誠基督徒，年前發起重整道德運動「全城更新」，拯救香港人，有見明星淫照事件越演越烈荼毒青少年，遺禍深遠，所以搞上述活動。佢當日上台發言宣揚「馬太福音」，直指淫照事件係因為有人濫用自由，做出啲冇規範、冇責任、冇承擔嘅事，後生仔衰放縱、失控、自我中心，唔單止令自己受傷害，仲連累父母、師長，總之害得人多。
「馬太福音」導人向善，馬太語重心長咁話，搞到社會風氣敗壞，最衰就係好多男人「唔顧家」，置家庭於不顧，大嘅唔好教壞細，正正係好多社會問題根源。根據「馬太福音」，男人應該要有承擔，帶領老婆仔女走光明道路。即係好似黃師傅咁，企出嚟大喝一句：「男子有責！」馬太批評好多男人唔顧家，八方相信應該唔包括佢老公肥馬，事關肥馬近年修心養性，唔顧家應該冇佢份，實唔使俾鄧光榮大哥鬧兼要佢公開表白。

女強人為信仰棄事業

可能好多人唔知肥馬係虔誠基督徒，佢信教係受老婆影響。馬太系出名門，係上海紡織大王王統元姪女，以前係搵大錢女強人，十幾年前忽然信教，而且極之虔誠，後來放下事業，03年創辦「全城更新」活動，同年肥馬受浸，佢哋大女Christine都係教徒，甚至不惜放下高薪厚職去傳道㖭。
好多外國政要另一半都有介入政治，上陣助選、推銷政策好平常，克林頓兩公婆係人辦，香港高官另一半好低調，特首夫人只係做吓賀年短片配角，馬太企出嚟宣揚「馬太福音」算好罕見，佢又響應政府，深入天水圍幫助低下層，近期傑作係舊年12月頂替旅發局，喺中環皇后像廣場豎立巨型聖誕樹，令佳節期間中環唔使冷清清咁失禮。
講番上述「公義之聲」大會，連特首夫人曾鮑笑薇都有捧場，黃仁龍、林瑞麟、李少光等高官都有現身，「馬太福音」喺官場信奉者眾，真係唔可以小覷。
mailto:[email protected]