有70幾年歷史、被喻為香港十大鬼屋之一嘅元朗大旗嶺村古宅「筱廬」，近期因為有被拆危機再度受注意，但查實喺唔少靈異界識途老鬼眼中，最猛嘅鬼屋非元朗屏山達德公所同達德學校莫屬，坊間唔少人都「慕名」探險。

唯一供奉抗英烈士之地

有「鬼王」稱號嘅網上電台靈異節目主持潘紹聰亦「推介」達德系鬼屋「好猛」。達德公所係本港唯一供奉抗英烈士嘅地方，有村民聲稱見過烈士遊魂同士兵團練步操，難怪鬧鬼傳聞不絕；達德學校盛傳校園後山曾經係亂葬崗，所以都流傳唔少鬼故事。
大家亦唔好睇小灣仔船街南固臺，鬼王話南固臺猛在附近有幾次吊頸，仲有人聲稱闖入去後見到嘢。佢近日亦去過曾經囚禁政治犯嘅摩星嶺白屋，話嗰度係嚴刑拷打場地，有靈探話喺現場「有料到」，咪話唔猛呀。
至於據知有街坊路過時聽過屋內傳出麻雀耍樂聲嘅筱廬，則非鬼王嘅鬼屋之選。而自稱筱廬業主代理嘅陳先生噚日主動向本報話，筱廬一直冇人住，何來麻雀聲？唔排除對相關報道採取法律行動。查實邊個話過，打麻雀嘅一定係「人」呢？

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange