由日本男星北村一輝主演嘅日劇《貓侍》，一直好受貓迷歡迎，上年拍咗電影版之後，第二套電影噚日喺日本上映，北村抱住片中白貓玉之丞去到東京一間戲院謝票。由於《貓侍》好多戲份都喺主題樂園「日光江戶村」度拍，噚日個謝票活動中，大會仲請埋「日光江戶村」隻吉祥物武士貓做嘉賓。

不過，玉之丞似乎對呢隻假貓好唔順眼，不停咁怒睥住武士貓，好似嫌武士貓搶佢鏡咁，好搞笑。玉之丞呢排紅到爆，佢趁住電影上映仲出埋寫真集。而噚日活動上女星LiLiCo亦有上台，佢見到北村就好熱情咁飛撲埋去，北村仲推開佢，兩個人喺台上好似打交咁，但玉之丞依然好冷靜。北村單手捧住玉之丞時，佢仲擺咗個擘腿高難度動作，姿勢分都攞晒啦。