由劉嘉玲、謝君豪同秦沛（Paul哥）主演嘅懸疑舞台劇《奪命証人》噚日喺半島酒店舉行記者會，呢齣劇7月28日喺香港藝術學院公演十場。秦沛話今次係首次正式演出舞台劇：「上一次係61年前同陳寶珠、蕭芳芳、姜大衛等柴娃娃演出，今次被說服初演舞台劇，過往拍過幾百部電視劇、電影，有乜嘢風浪未見過，但今次就怕緊張到急尿，好在有嘉玲同埋謝君豪睇住我。」而台下嘅老闆楊受成就話，可以着尿片解決。

「睬佢都儍」

劉嘉玲喺85年拍電視劇《江湖浪子》已經識秦沛：「初初入行經常去Paul哥屋企食飯同埋玩。」嘉玲聽到秦沛話要佢睇住，即刻話：「我睬佢都儍，佢係詐嬌箒，佢咁好戲。」嘉玲對上一次演出舞台劇已經係四年前《杜老誌》：「今次演出係比較難，因為要好多法庭戲，要懂得把握節奏。」嘉玲仲大讚秦沛有實力：「Paul哥人生經驗豐富，我演過兩次舞台劇，出到台就唔會驚，好彩因為燈光望唔到現場觀眾，不過始終會有人電話響、咳，會有多少影響。」另外，嘉玲之前網上貼同媽咪去撒哈拉沙漠旅行相片：「有去滑沙，景觀好震撼，令我有好多諗法，了解到人有好多唔同文化。」
撰文：馮仁昭