大台高層余詠珊，自80年代大學畢業後就已經喺大台工作，不過現時執掌大台綜藝科嘅佢其實都曾經去過好多唔同嘅電視台工作，更加拉攏咗一班御用藝人令大台近年風雲色變大換血。

早喺80年代，余詠珊本來喺大台幫一眾綜藝節目好似《勁歌金曲》、《歡樂今宵》等擔任編劇，直至90年代過檔去亞洲電視，過檔後最為人熟悉嘅節目有《今日睇真Ｄ》，第一次將資訊性節目直播比家庭觀眾。

搞完一輪之後余詠珊就再次跳槽去到有線電視，仲有份創立有線娛樂新聞台，跟足新聞台嘅規則24小時瘋狂發放娛樂新聞，仲成功培訓出一班專門追訪娛樂新聞嘅主播同記者，好似有陳貝兒、陸浩明、黃翠如等都係由有線娛樂新聞台出道。

到咗04年余詠珊又番返去大台幫手搞收費電視，照辦煮碗將當年喺有線嘅做法拎返嚟搞，仲拎埋「志雲大師」陳志雲出嚟搞咗個《志雲飯局》，直至11年陳志雲離任，佢就去返大台出任綜藝科總監一職。

回巢之後余詠珊極力任用自己昔年喺各大電視台嘅班底，特別喺亞視幫同有線幫，好似有田蕊妮、黃翠如、洪永城、萬綺雯等等，係呢個情況下，大台本來一班一線藝人好似陳法拉、林峯等都轉咗做部頭合約，最後仲離埋巢，做就咗今時今日大台嘅情況。