陳加玲同外籍人士似乎特別有緣，之前佢曾經被本報拍得同一位貌似球星馬勒當拿嘅外籍男士當街擁吻嘅照片，不過噚日凌晨加玲又同另一位外籍男伴齊齊遊車河，其間佢哋重喺車廂中「依泣」，頭貼頭攬埋一嚿，極之親熱。

突然攬埋一嚿

噚日凌晨兩點幾，陳加玲同頭戴cap帽嘅外籍男伴乘坐佢架七人車，由司機車佢哋去到中環擺花街，佢落車匆匆走入一間賣熱狗外賣嘅小食店，跟住就上番車，由司機負責喺舖頭等外賣，而陳加玲就趁住呢個機會同男伴傾密偈。
當時坐喺車廂後座嘅陳加玲彎身到前座攞雜物，無意中就露出佢條蠻腰，後座嘅男伴就睇到眼甘甘，之後陳加玲坐回男伴身邊，兩個人不斷耳語之餘，重突然攬埋一嚿，又頭並頭親熱一番。
冇耐陳加玲發現有記者，即刻縮開一邊避鏡，反而男伴就望咗記者幾眼，但之後亦未有理會，繼續興高采烈，係咁不停指手劃腳講嘢，直到司機拎咗外賣上車，陳加玲就即刻叫司機嗱嗱聲開車離開。