【戥佢開心】鍾麗淇好偉大 陳敏之：佢帶咗好多正能量俾身邊嘅人

蘋果日報 2017/12/02 19:34

陳敏之王君馨性在有情
    陳敏之今日帶同囝囝雷子樂，一齊為劇集《性在有情》宣傳，同場嘅仲有王君馨、阮兆祥、江美儀。
    敏之嘅囝囝今個月21日就1歲生日，但敏之就話打算餵母乳餵到1歲，佢話囝囝o依家11個月，都冇咩病痛，就算有病都好快康復，所以佢就堅持繼續餵母乳。聖誕將至，敏之就話會留喺香港過，仲會幫囝囝慶祝生日，佢話可能會搞一個大型生日派對，構思中會佈置成馬戲團咁。敏之話：「因為囝囝鍾意動物，阿仔生日仲緊張過我自己，但係老公就緊張阿仔升學問題。」問佢幾時追番個女湊成個好字？佢亦好坦白話都想追個女，但就希望等阿仔讀書先喎！
    提到鍾麗淇大女Isabella患有罕有基因病「四號染色體缺損綜合症」，今日鍾麗淇就上載咗一段囡囡以助行架步行嘅片段( 新聞連結： http://bit.ly/2AP3ekN )，敏之就大讚鍾麗淇好偉大同堅強，帶咗好多正能量俾身邊嘅人，見到佢囡囡嘅進展都好感同開心。
    同場嘅王君馨就被問到幾時做媽媽？佢就話感恩節時有返美國探老公家人，其間知道老公原來係七代唯一男丁，所以就要靠佢哋傳宗接代，搞到佢都有啲壓力，幸好婆婆就話仔女都無所謂，老公又冇俾壓力，所以佢都會順其自然，過吓二人世界先！

    更多娛聞，喺晒《娛果》
    http://fb.com/appledailyent
    empty
    陳敏之話鍾麗淇嘅正能量，感染咗身邊好多人。
    empty
    敏之話囝囝就1歲生日，打算同佢開大型生日會。
    empty
    王君馨話之前陪老公返美國，先知佢係七代唯一男丁。
    empty
    江美儀同沈震軒
    empty
    佢哋着住校服宣傳。
    empty
    鍾麗淇今日上載咗囡囡用步行嘅短片。