04年港姐冠軍徐子珊，以前曾被質疑「升鼻削面」，對於新鮮出爐冠軍雷莊𠒇被彈「至醜港姐」，子珊今日喺灣仔出席活動時，被問有冇留意港姐？即刻閂後門兼扯開話題：「自己冇時間留意，因為9月1號重新做學生修讀心理學碩士，雖然係part time，但都要讀兩年，仲要一返學發覺買唔到要上堂嘅書。」

咁有冇男同學主動獻慇懃?子珊話：「冇，反而女同學成日走埋嚟傾偈，當中好多父母級，其中有個60歲，自己o依家讀都未算太遲。」記者乘機再問讀心理學可以輔導港姐師妹，子珊推搪話：「我有排都未畢業啦。」

對於今年港姐好多負評，子珊繼續支支吾吾，問到當年面對呢啲新聞有冇壓力？佢表示：「就係自己面對呢啲新聞唔叻，所以先讀心理學。當年因為屋企人同朋友都冇圈內人，自己要由零開始學起面對新聞，試過會喊同成個人腫晒。」問到當年有冇被批評，唔係實至名歸？子珊避答：「每人心中都有睇法，冇辦法討好每個人，只有自己做好自己。」

此外，同場嘅盧凱彤就表示好支持環保：「咁多年都用唔同方式環保，如之前食咗十年齋減少炭排放，但自己身體承受唔到，o依家食番肉，用另一方式支持環保，如減少開冷氣，坐多啲公共交通工具。」