麥當勞噚晚喺灣仔會展搞咗個兒童慈善餐舞會,城中好多善長都有出席,有啲嘉賓實行扮鬼扮馬,悉心打扮一番為舞會搞吓氣氛,當中最惹人注目嘅,要算係周啟邦伉儷,皆因佢哋套衫有龍有鳳,但睇落又似係西式禮服咁款,大玩中西合璧。
而「香港良心」陳方安生,噚日亦有出席,並擔任主禮嘉賓。有行家問陳太,喺律政司司長黃仁龍決定為女模特兒彭楚盈案重開死因研訊後,最近有冇同兄長方曼生見面,陳太就不假思索咁答話「有」。跟住有人問佢哋喺見面時有冇講到有關嘅案情,陳太就顯得有啲尷尬,稍為諗咗一陣,就講話「平生不做虧心事,半夜敲門也不驚」,跟住就走人。
八方心諗,經歷過唔少政治風浪嘅陳太,冇理由為咗呢啲小事而受到困擾,可能嗰十四個字都係佢咁多年嚟,做事嘅處事方式。
傳真︰2623-9278
電郵︰
[email protected]