【新增動新聞】

皇家馬德里封王只差一分！周三西甲獨腳戲，皇馬作客近期各項賽事9場不勝嘅切爾達未有錯失贏波機會，憑基斯坦奴朗拿度（C朗）梅開二度，加埋賓施馬同卻奧斯入波，作客大勝4:1，只要煞科戰作客馬拉加有分落袋，就可以重奪失落4季嘅聯賽錦標！

皇馬踏入爭標直路強陣出擊，繼續代替加里夫巴利擔正、夥拍賓施馬同C朗攻堅嘅艾斯高，開波10分鐘就有貢獻，左路引球推進後輾轉橫傳。C朗禁區頂推一腳起左腳勁射，個波穿過對手守將「細龍門」入網，為皇馬領先1:0。切爾達大打風流波亦踢得進取，丹尼爾華斯罰球勁射俾皇馬門將基羅拿華斯擋出，伊亞高艾斯巴斯窄角度抽射亦告斜出，皇馬亦有賓施馬半單刀射得太正，半場只係領先一球。

皇馬換邊後3分鐘照辦煮碗，又係艾斯高中路銜枚疾走，今次傳畀左路接應嘅C朗單刀射近柱入，為「銀河艦隊」贏到兩球；C朗入埋呢兩球，個人亦先後為曼聯同皇馬攻入368個聯賽入球，打破英格蘭名宿基夫斯（Jimmy Greaves）保持逾40年嘅歐洲5大聯賽入球紀錄。雖然切爾達62分鐘有射手艾斯巴斯禁區內似乎俾沙治奧拉莫斯撞跌，但球證竟然指佢插水兩黃一紅被逐，仍然喺69分鐘把握艾斯高回傳失誤，約翰古達迪起腳省中沙治奧拉莫斯改變方向入網，一度燃起搶分希望，但賓施馬一分鐘後極速還以顏色，接應馬些路左路地波傳中輕鬆撞射入網，為皇馬再度取得「cushion」球領先3:1，加上卻奧斯尾段埋齋，皇馬大勝4:1，37戰得90分下領先巴塞隆拿3分，意欲染指2011/12球季後首個聯賽錦標，主動權盡在自己手中！兩場關乎爭標形勢嘅西甲煞科戰將會喺香港時間周一2:00am上演，皇馬將要作客馬拉加，巴塞隆拿就喺主場迎戰伊巴。

西甲兩頭馬車形勢
1. 皇家馬德里 37戰90分
餘下賽程：21/05客對馬拉加

2. 巴塞隆拿 37戰87分
餘下賽程：21/05主對伊巴

*若兩軍同分，將按今季對賽成績決定排名，巴塞隆拿以一勝一和佔優