當年今日
關於我們

【韓流】宋康昊第三部千萬電影 《逆權司機》突破千萬人次

蘋果日報 2017/08/20 11:30

千萬人次逆權司機宋康昊

由韓國影帝宋康昊、劉海鎮、柳俊烈主演嘅韓片《逆權司機》本月2號喺韓國上映,下月將喺香港上映。
電影喺韓國上映氣勢如虹,一直保持住單日票房冠軍寶座,噚日周六《逆權司機》繼續引37萬人捧場,累計觀影人次達996萬名觀眾,今日係電影上映第19日,喺韓國時間上午8時,《逆權司機》累計觀影成功突破1千萬人次,成為今年第一部電影喺韓國突破千萬,同時係韓國史上第19部電影以及第15部韓國電影突破千萬人次。
而今次已經係宋康昊第三部電影引千萬觀眾捧場,之前佢主演嘅《韓流怪嚇》及《逆權大狀》都成功破千萬人次。
另外,由朴敘俊及姜河那主演嘅《青年警察》雖然撼正《逆權司機》,票房亦一直屈居其後,但《青年警察》keep住走勢,噚日單日有近35萬人次,累計觀影已達357萬人次,成績十分理想。而《青年警察》將於下周四(31日)喺香港上映,姜河那更會於下周一(28日)襲港為電影宣傳。