伯老真的退市了，美股當好消息炒，中港股市就散水收場！歸根究柢，都係A股弱爆累事，滬股連跌第八日，加上三中全會定調「去槓桿化」，連續兩周冇做逆回購，令銀行同業拆息大幅抽高，7天回購利率飆至9.8厘，6月份「錢荒」陰霾又殺埋身，短期難有運行。

技術走勢上，恒指、H指齊齊大陰燭「穿頭破腳」，失守保力加通道底部，後市波幅應會擴大，走勢隨時為今年6月的翻版。恒指先睇牛熊線22587，都失守的話睇21500。

有貨點算好？魏力建議起碼減一半，盡量保留實力，因為唔知要捱幾耐。炒股不能抱僥悻心態，入貨坐艇後，以為只要死守就能「返家鄉」，結果讓虧損不斷擴大，40元買國壽（2628）的話，坐了六年仍要輸四成，但人生有幾多個六年？再者，大廈失火，一定是先聞煙味，再見火頭，到燒埋身才逃命甚為不智。

如此市況實在不想推股，更不建議冒險進場，但本欄圖表行先，有好圖亦不妨開心share。長倉基金唔係話清貨就清貨，點都要有一定比例的持倉在手，資金避險，一般會投向防守性較高的醫藥股及REITs，同仁堂科技（1666）走勢一向唔多跟大市，8月創28.9元新高以來持續整固，上月跌至21元水平後獲支持，昨逆市升2.5%，收報24.15元，重上250日線，有機為避險資金吸納，不妨留意。