今周市況勢必波動,因為歐、英、美同期議息,冇人夠膽批死聯儲局會否「神經刀」暗示快將加息,果真如此則勢必引來以借美元喺全世界喪炒緊嘅CarryTrade資金班師回朝。
隱憂仍在,但IPO尾班車繼續開,兩股勢力大鬥法,夠貼市嘅炒友當然開心,單睇利邦控股(891)第一個價Mark上3蚊後急跌番落兩蚊再反擊上過3.32元,然後又趕於收市前埋單,就知即市已成殺戮戰場。即使要坐貨嘅炒友,篤手指T+2肯定要埋單,所以就算見歐洲股市開市冇乜事,內地亦升,港股尾市仍係不問價沽貨。
太多不明朗,投資者即市有食唔食,罪大惡極,因為今日唔知聽日事。唔知明天會點嘅仲有聯儲局班「茂利」,對唔住都要粗鄙啲,因為市場多得佢哋唔少,3月到家一直話長期維持低息環境,最近又放風話有意改會後聲明嘅字眼,仲越玩越大,話會急速加息打「花章」去打擊班炒家大鱷。
要自吹自擂、自我完成唔該行埋一邊,以今時今日嘅美國經濟,做中小企借貸嘅CIT同商廈興衰指標嘅Capmark先後要申請破產保護,銀行信用卡撇賬不斷增加,要玩加息請望吓澳洲先,人家要多次調升經濟增長預測,加息0.25厘後已立即給市場暫停加息訊息,生怕資金外流影響經濟復蘇。美國經濟現時氣若游絲,有加州朋友話當地大型商場唔少仍係十室九吉,咁點談得上加息?
萬萬億救市只係救Banker,伯南克早已冇晒子彈,家要退市,惟有靠愛將天才經濟師BrainSack,透過抵押MBS、國債等資產,抽走市場資金,將聯儲局變身為大債仔。諗頭唔錯,因為既可暫緩加息步伐,又令到炒家冇影可跟,但問題係當儲局運用市場手段靜靜雞抽走資金時,令金融市場波動加劇,又會成為政客話柄。
伯南克技窮,但勝在唔忌才,三顧草蘆將Brain仔喺普林斯頓搶過嚟,令佢39歲仔入聯儲局擔大旗,家可以話全世界靠晒佢。權力令人腐化,但若能好好運用卻可安家衛國,為政者又好,公司做管理都好,知人善任唔應該讓老外專美。
胡孟青