林家棟做電影導師傳承專業 額頭磨薑留疤要到韓國整容
蘋果日報 2021/06/22 18:47
林家棟韓國惡行之外
林家棟、導演文念中與劉天蘭等，今天於觀塘出席《開班！電影美術及服裝造型十三課》 。他們宣佈招募50名學生接受專業課程，劉天蘭指未開記者會已有人報名，反應十分熱烈，而今次他們更邀請得31位電影界的專業人士教導，包括家棟、林嘉欣與名導關錦鵬，將電影專業傳承開去。
林家棟早前拍攝由郭文奇執導的新戲《惡行之外》時左額受傷，當場流血，要入院鏠10針，今天見家棟額上依然留有疤痕，他說：「磨薑呀！嗰場係喺廢屋度拍攝，地下有沙包，我塊面就喺度磨，已經覺得『乸乸』哋，而家啲導演好嘢，咁都唔嗌cut，好彩效果唔差，導演都收貨，係血肉換返嚟，古仔又送禮物俾我，不過好少事，男人總要有啲痕跡。」他表示因拍攝場地污糟，怕傷口感染所以立即去醫院，問到鏠針後有否立刻返回工作崗位？他說：「好專業㗎......個醫生，寫咗一個星期病假，醫生手勢好好，可能加上我有運動，復元得好快。」見家棟傷口較深色，明顯有疤痕，他笑言待通關後便到韓國走一趟，問醫生意見如何「變靚」。
-----------------------------