懲教署署長單日堅聽日平安夜Last day，26號正式展開退休前休假，結束35年懲教生涯。咪以為單sir急不及待即刻遊埠嘆世界，佢話懲教工作其實好忙，開始放假先會認真同太太研究去邊旅行，最快農曆年後至出發。佢話暫時冇人邀請佢做公職，更唔會搞生意，「印象中公務員退休從商都係失敗居多」，但有興趣做青少年工作，仲要義務嗰種。

35年懲教生涯，單sir印象最深係工作最耐嘅赤柱監獄保安組，主要係收集情報、調查監獄入面嘅非法活動，甚至懲教職員操守不當都要負責，同警隊CID差唔多。而在任署長呢4年幾，單sir話自己畀自己嘅工作絕大部份都完成晒，係一個完美嘅句號。佢噚日仲首次開放署長辦公室畀傳媒參觀，入面有幅單sir親手題嘅字「公道」，係佢做懲教嘅格言。
臨別依依，單sir仲記得幫手足抱不平。話說港大民研每半年都會就紀律部隊進行調查，懲教次次五大不入，「一般市民唔係懲教服務使用者，都冇接觸過，唔識㗎嘛！」佢話已經同港大反映，但仍然冇改變，有啲耿耿於懷囉。