今時今日買個球星都要億億聲，續約又話十幾萬鎊周薪起標，英超球隊雖然每年收唔少轉會費收益，但都要搞到開源；好似阿仙奴咁，就宣傳同美國電影公司環球合作，以後兵工廠球星就會喺環球電影嘅宣傳片客串登場，第一套好大機會係月底上畫嘅《壞蛋獎門人3》。

其實球會同電影公司合作都唔係新，曼聯搵錢一向積極，之前已經同霍士合作，前鋒朗尼、門將迪基亞等，已經喺X-Men:天啟嘅宣傳片粉筆登場過，而且阿仙奴同環球合作已經唔係第一次，聯賽煞科戰對愛華頓，電影公司已經派成班壞蛋現身阿聯酋球場，兵工廠亦都應承肯定有奧斯爾、阿歷斯山齊士等球星撐場拍以後嘅宣傳片，第一套相信係壞蛋獎門人3，如果一眾球星，甚至領隊雲格扮吓黃黚黚嘅壞蛋，就真係幾搞笑。

講開阿仙奴，今夏佢哋就會東來，先後到澳洲同中國友賽，7月13同14日到訪悉尼，同FC悉尼與西悉尼流浪者友賽，德國中場奧斯爾冇份踢洲際盃，相信係友賽最大牌球星，佢就話自己未去過澳洲，好期待今次到訪悉尼之旅，希望有時間可以好好參觀呢個城市。