周六牙買加田徑大獎賽，東道主選手保特以10秒03贏得男子100米冠軍，而「閃電」衝線之後，場館更大放煙花，送別呢位傳奇跑手。保特喺8月倫敦世錦賽後就會退役，佢完成主場告別戰之後，更坐住黑色開篷車繞場一周，向35,000位觀眾致謝：「我唔知有咩字眼可以形容現時嘅感受，大家由世青賽開始支持我，而我冇咗家人、朋友、老友NJ、同埋牙買加人民嘅支持，都唔會攞到現時嘅成就。」