今日再講如何透過扒冷「開源」，並繼續以上季30倍或以上冷Win作案例。

講到揀馬房扒冷，不少馬迷總會覺得大倉贏馬多兼長期成為市場焦點，點會有冷門爆？與此同時，又認為下游倉口部署方面比較輸蝕，有時出擊時間拿揑得不好，較大機會因「爆軚」出冷，但從統計顯示，上述兩種想法，根本是諗錯隔離。

無錯，上季冠軍蔡約翰的確未贏過30倍或以上冷Win，但排二至四名的大摩、方嘉柏以及蘇偉賢，合共炮製了10支冷箭，以上季同類馬贏了35匹，單是這三個倉已佔了當中三成，相反，上季榜尾三廐，只有鄭俊偉爆過47倍「金剛仔」！

值得一提上季方嘉柏贏了五匹30倍或以上冷Win，以10蚊注計共衍生總派彩$4,968.5，以全季方廐屬這賠率範圍的出賽馬為166匹，如長追10蚊本錢$1,660，有兩倍利潤相當厲害。

另外，又有朋友覺得泥地賽是爆冷溫床，因為常有初跑泥地的不明物體，但以上季賽果顯示，泥戰僅爆過「麟轉乾坤」及「開心美麗」兩匹冷Win；至於跑長途則步速古靈精怪，應該是爆冷溫床，但事實上季跑2000米以上長途，並無出過30倍或以上冷Win。

最後，五班賽多老傷病弱殘會爆冷嗎？但上季這類冷Win只得三匹，佔總數不夠一成，所以若大家當視賭馬並非娛樂的話，請要學懂不再做印象派。