一班反對美國人格拉沙入主球會嘅曼聯球迷,眼看事實既定,點反都無用,決定自組一支「新曼聯」,正式參加地區聯賽,循正途望有朝能夠打上超聯,同格拉沙嘅曼聯爭一日之長短!
由為數約三千人嘅曼聯迷組成嘅「新曼聯」,球會名同曼聯差唔多,叫做「曼徹斯特的聯合球會」(FCUnitedofManchester);最近亦獲聯賽會接納申請,來季將於非職業聯賽組別嘅西北部郡區聯賽競逐。另一支非職業聯賽球隊德羅伊爾斯登(Droylsden)嘅班主兼領隊披斯先生,本身都係曼聯躉,義不容辭地借出自己球會嘅球場,畀呢支「新曼聯」做主場。