近期不少藝人受非典型肺炎影響，損失不少搵銀機會，不過宣萱卻非常好彩，在逆市中已先後拍攝了洗頭水Head&Shoulders、護膚品Neutrogena、內地樓盤及內地芳香劑四個新廣告，豬籠入水。

自嘲鐵線頭
最近宣萱成功踢走王菲，擔任洗頭水代言人，入行以來首次拍攝洗頭水廣告的她，三個星期前在泰國布吉島三日，拍攝洗頭水電視廣告。
宣萱在布吉島一間小屋內拍攝，廣告講述她擁有一把清爽秀髮，拉近了人與人的距離，更獲擔任廣告男角的英俊台灣男模特兒輕吻秀髮。
宣萱對獲洗頭水廣告商青睞感到十分興奮，因其髮質比較硬，以前短髮時，更自嘲是鐵線頭。由於洗頭水廣告必定拍得靚，所以她一直十分希望拍洗頭水廣告。直至近年宣萱多拍古裝劇，經常戴頭套，所以有機會留長頭髮。

勤賺錢養老
廣告商就因為看中她的一把長髮，以及形象健康，邀她簽約一年，擔任代言人，談到酬勞，她只稱滿意。
對於頻頻接廣告豬籠入水，宣萱昨日在電話中說：「我賺錢養老呀，做老姑婆係最壞打算，要有啲錢傍身嘅。」
此外，近日有報道指宣萱以三十萬元平價踢走周嘉玲，任Neutrogena代言人，她說：「價錢絕對唔係呢個數目，其實Neutrogena年年都有斟我拍廣告，我好多謝佢哋，但我就冇過問個廣告之前係邊個拍。」
採訪：朱芷瑩