英超雖然已經收咧，英國就有個叫voucherbox網頁就公佈一個統計，講各隊球迷平均俾幾多錢可以欣賞一個入波，原來上季最貴就係阿仙奴，球迷平均要俾27.5鎊（約270港元）先睇到一粒，最抵就係侯城，6.86鎊（約68港元）就睇到一粒。

網頁嘅統計就好簡單，以英超各隊嘅平均主場季票售錢，除番19場主場比賽有幾多入球。阿仙奴位於高物價嘅北倫敦，所以平均1510鎊嘅季票，都係冠絕英超。雖然呢19場比賽阿仙奴入39球失16球，都合共有55個波，但因為票價貴，除開都要成270蚊。熱刺、曼聯就排最貴嘅第二同第三位。

最抵睇就係侯城，因為佢哋平均季票票價只不過432鎊（約4300港元），但19場主場就合共炮轟63個入球，平均唔使70蚊就睇到球。不過咁，當中有35球係客隊入，如果捧老虎就有啲失望，而且侯城下季都要降班英冠啦。