鄭融和連詩雅噚晚喺沙田為下星期六嘅騷做綵排，佢哋即場示範咗一part勁歌熱舞，點知見到鄭融露出一塊葯貼，原來佢用熱髮卷時，唔小心「辣」親個肚皮。

話晒鄭融有跳舞底，唔知連詩雅對住佢又有冇覺得好大壓力呢？佢話：「都係做番自己本份，我都好驚自己會甩，拖累晒大家，o依家一跳舞就好專注，個腦係咁諗住啲舞步，但係記住舞步，又唔記得歌詞。」鄭融有啲尷尬，即刻幫手兜話：「其實經過咁多溝通，工作，私底下，發覺佢係好穩陣嘅人，成日話自己甩，其實佢無錯過。」連詩雅續說：「次次排無事，一有cam錄住就好似發台瘟咁。」咁鄭融都好有心話俾到大家新鮮感，可以展示到大家嘅默契。

最近連詩雅同徐浩傳緋聞，唔知到時男方會唔會上台，連詩雅即刻有少少尷尬話：「佢一直係台，佢係band member其中一個。」鄭融即刻好識做咁話會讓開俾佢哋：「我識做，我都好想成全佢哋呢一個moment，喺呢個經歷有一個好珍貴嘅回憶。」