台灣綜藝天王吳宗憲兒子吳睿軒（藝名鹿希派），上月在Ig發表女友沒病好就炸台北市政府言論，結果老竇在記者會上代子宣布退出娛樂圈，點知「退出」僅10日，鹿希派就自行宣佈復出。前日鹿希派孖女友水兒拍拖出巡，睇完戲後趕下場返屋企，二人世界減壓。

前晚台灣《蘋果》在微風復興館中庭露天雅座，見到戴cap帽嘅鹿希派跟友人聚會，長髮女友水兒就坐在身邊，幾乎全程玩手機乖乖陪男友，大約1小時後眾人轉場去睇戲，鹿希派話晒係圈中新人，已經好叻玩喬裝，仲同女友齊齊「變身」避傳媒耳目，男嘅戴上口罩遮樣，女嘅戴闊邊帽同黑框眼鏡，鹿希派仲幫女友攞手袋㖭。

一行人買飛睇由金像影帝丹素華盛頓（Denzel Washington）主演嘅《叛諜裁判2》（The Equalizer 2），在等候入場時，水兒四圍望好似怕人認出，但最後又大膽玩除帽，似要全世界知佢同男友大方拍拖。電影於近晚上11點散場，記者在戲院門外等候時，發現同場有吳大維、莫允雯。而鹿希派與女友散場後搭的士返男方屋企，同行還有一名男友人做電燈膽，記者等到凌晨12點幾，見到男友人獨個兒離去，讓鹿希派同女友享受二人世界。

其後水兒在IG貼笑臉相，風騷留言：「水兒笑嘻嘻」，擺明心情好high；之前吳宗憲未認准兒子女友身份，僅指雙方係朋友關係，對於兒子帶女友返屋企，吳宗憲以短訊回覆：「我忙着錄影啊！不好意思啊，回答不了一些我根本也答不出來的問題。」而鹿希派則透過經理人表示沒有回應。

精選娛聞，喺晒《娛果》
http://fb.com/appledailyent