韓國電影《下女誘罪》嘅34歲女星金敏喜，去年陷入不倫醜聞，被爆戀上55歲嘅已婚導演洪尚秀，更搞到洪尚秀申請同結婚31年嘅妻子離婚。雖然是非纏身，但日前金敏喜就憑洪尚秀執導嘅新片《獨自一人在夜晚的海邊》成為韓國首位女星封柏林影后，揚威海外。

去到國外，金敏喜完全冇避忌，領獎時高調喺台上向男友示愛外，喺台下亦不避忌挽住男友手，認真戀愛大過天，不過佢此舉就引起韓國網民不滿，覺得佢完全冇顧及洪尚秀妻子嘅感受。

而之前幾位女星喺國外獲獎都會得到文化部表揚，好似全度妍2014年憑《密陽》封康城影后，姜秀妍於1987年憑《接種》得威尼斯影后等，二人獲獎後都獲頒發勳章，所以韓國傳媒就估計金敏喜亦有機會獲頒勳章，即時引發網民爭議，覺得金敏喜嘅私生活咁混亂，唔配獲頒勳章。

韓國文化體育觀光部嘅相關人士就話仍然討論緊有關金敏喜獲頒勳章一事，暫時未有定案。

另外，《獨自一人在夜晚的海邊》喺講有關女演員戀上人夫嘅故事，同現實生活中嘅金敏喜好相似，而韓國方面就將電影劃分為「不適宜未成年人士觀看」，當中電影因有大量吸煙同埋飲酒片段，加上婚外情內容會誤導未成年人，所以就被判定為唔適合未成年人士睇，似乎怕電影教壞細路。電影將於下月23號喺韓國上映。