八方翻查資料,發現KC過去幾年預測經濟眼光,同十分受市民愛戴嗰啲風水堪輿運程星相大師不相伯仲,真係信則有,不信則無。以反映經濟增長嘅本地生產總值為例,05年佢預測增加4.5%至5.5%,結果增長咗7.3%;06年預測增加4%至5%,結果增長咗6.8%;07年佢睇升4.5%至5.5%,揭盅增長率卻達6.3%。
其他預測都差唔多,05至07年通脹率,佢預測分別係1.5%、2.3%、1.5%,結果實際通脹率係1.1%、2%、2%,總之就信唔過,唯一可以信嘅,就係唔好信政府啲預測數字。經濟環境瞬息萬變,預測經濟數據係高難度動作,難過天文台預測颱風走勢,KC選擇唔撈,可能係佢計算得最準確嘅一次。
郭國全11月1日會正式離開政府,佢下屬首席經濟主任陳李藹倫會頂上。呢位陳太現年46歲,1986年加入政府由經濟主任做起,官場中人指佢經驗不成疑問,至於對經濟預測會唔會準確啲,呢啲嘢,點講得準㗎!
mailto:
[email protected]