有消息傳新股東司榮彬已籌募到3,000萬元資金，有機會於今日發放1月份薪金，今早一眾亞視員工如常上班，返工人數明顯比之前多，由早上9點起，連續三架員工車幾乎爆滿。

早上10點幾左右，一架掛有中港車牌嘅七人車抵亞視門口，有兩名戴住証件嘅女士，經保安登記入亞視，登記時見其中一位女士，手袋放有一些文件，入亞視逗留唔夠5分鐘就離開，離開嗰陣，被問係咪新投資者，不過，兩女並未有回答。據知兩女係交文件畀亞視。

《蘋果》根據兩女坐嘅中港車牌查證，發現兩女嚟自中國創新投資有限公司。亞視上年九月宣佈司榮彬透過旗下公司「中國文化傳媒國際控股有限公司」，當時司榮彬表示欲與兩間上市公司「中國創新投資有限公司」及「中國趨勢控股有限公司」達成合作協議，出售亞視劇集版權及網上電視平台，更估計可獲千萬資金，未知今日派兩女嚟提交文件係唔係同早前協議合作一事有關!?