【狗仔出更】胸脹肚凸凸似有喜 36歲周家蔚：天明話唔生住
蘋果日報 2019/08/30 22:30
洪天明周家蔚又一城
剛剛過了36歲生日的周家蔚（Janet），2012年與洪天明結婚後，誕下現年6歲的洪大仁（TJ）和4歲的洪竟琋（JT），一家四口過住幸福的家庭生活。不過他們似「兩個唔夠數」，事關老爺洪金寶曾表明恨抱孫女，加上Janet本身亦恨生女，天明曾說會交由太太決定。
日前《蘋果》在又一城見到Janet，當時她身邊未見兩個囝囝，只有一名拖住篋的外傭姐姐同行，相信是等候囝囝放學。穿上露肩裝的Janet與外傭姐姐在商場的餐廳食下午茶，兩人各自點了一杯凍飲，接着便開始做低頭族，全程狂撳手機，Janet似有不少電話留言要處理，不時見她將錄音跟外傭姐姐分享。她們在餐廳逗留大約20分鐘，忽然見到Janet如夢初醒般彈起身，跟外傭急急腳離開，似乎是撳手機撳到差點錯過接囝囝的時間。她們坐升降機到地下樓層取車離開，不過細心一看，Janet的肚凸凸，孕味極濃，莫非已經成功造人，與好姊妹梁靖琪齊齊陀B？
事有湊巧，Janet近日在IG貼了與郭少芸齊齊慶祝生日的相片，除了天明外，曾志偉、苗僑偉與太太戚美珍、湯盈盈、方力申、文頌嫻和姚樂怡等人亦有出席，穿上白色tee的Janet，身形圓潤了不少，尤其是上圍明顯升Cup。其後《蘋果》向Janet求證，她以短訊回覆：「哈哈，唔係呀，只係肥咗！成個暑假不停飛，不停走去食嘢，根本冇停過，等我食埋啲生日飯，就開始減肥！」再問造人大計是否繼續進行，她說：「冇呀，天明話唔生住，所以而家唔考慮呀！屋企有兩個小朋友已經好足夠，好熱鬧！」
採訪、攝影︰羅德光