ViuTV綜合格鬥真人騷《G-1格鬥會》第二季比賽今日舉行記者會。8位參賽者包括有麥家琪、何慈茵、馬倩宜、麥紫莉今日喺記者會清一色着住Top同運動服露腰，而稍後一眾參賽者就會去日本對戰。

久未露面嘅麥家琪，明顯比前操fit咗，自我介紹時，麥家琪就話：「對上一次見大家時，自己仲未結婚，今次再見大家，自己已經結咗婚生埋小朋友，今次參賽，其實係想話俾小朋友知做事要有堅持，希望大家可以正面報道節目。」

另一位參賽者何慈恩，自我介紹時，就話自己14歲已經學洪拳，係出自武林世家。佢話：「喺8個籠入面贏到冠軍，唔係靠運氣，而係靠一雙手打出嚟嘅。」

至於自爆虛構AV橋嘅麥紫莉，今日喺記者會上木無表情，對於參賽《G-1格鬥會》，佢就話：「以前啲人成日留意我身材，我想話俾大家知，我係靠努力同汗水成功。」