【新增趙正錫留言內容】
現年37歲嘅韓劇《嫉妒的化身》男星趙正錫，與主唱神劇《太陽的後裔》OST嘅37歲女歌手Gummy拍拖5年，今日韓媒報道兩人幾於今年秋天結婚，其後二人事務所確認消息，並透露兩人確實於今年下半年結婚，目前婚期未確定，婚禮亦以非公開形式進行，僅邀請雙方家人出席。

趙正錫同Gummy係透過朋友而認識，並於2013年開始發展情侶關係，到大前年先認戀，拍拖5年感情好穩定，今年更決定攜手步入教堂，認真可喜可賀。

隨後趙正錫亦喺官方粉絲專頁留言向粉絲公佈婚訊，並問粉絲對於今早嘅新聞有冇被嚇倒，笑言自己都被嚇倒了，佢話：「對於一直以來愛護我嘅粉絲，我想親自告知我人生中最重要嘅決定，想到以後有人陪我一齊走下去，好激動，亦都有點緊張。」趙正錫透露自己今年會結婚，但有關詳情就仍未確定，又冧爆話：「佢係這5年以來畀我力量嘅人，亦係今後令到我變得更加好嘅人，所以先決定結婚。我會成為有擔當嘅家長，雖然有許多不足，但係會以好嘅作品繼續同大家交流。」

更多韓流，喺晒《娛果》
http://fb.com/appledailyent