早排喺大台劇《不懂撒嬌的女人》做奸角田蜜嘅高海寧，一口流利嘅普通話真係估佢唔到，無他嘅，香港出世嘅高Ling，細細個就去咗南京住過兼喺當地讀書，講得標準是應該的！

高Ling今日就係微博post佢嘅兒時回憶，一張佢小學嗰陣同同學嘅合照，佢仲留言：「找到一張小時候的照片，猜猜哪個是我？」而重點唔係佢細細個已經有一對長腿，亦都唔係佢嗰條紅領巾，而係佢嘅hashtag「#童年回憶##南京妹子##小學生##我是少先隊隊員##紅領巾# ​​​​」。

冇錯！你冇睇錯高Ling自爆細個係少先隊，少先隊係咩？喺維基百科顯示，少先隊全名係「中國少年先鋒隊，是中國共產主義青年團受權領導的群眾性兒童組織。」嘩！自爆有咁「紅」嘅背景，唔通......有計劃返大陸發展？！