17歲的何超蓮前晚拖實在英國認識的18歲男友徐鈺恆（Tim）去ball，帶給賭王父親過目。當超蓮欲介紹Tim給父親認識時，賭王只顧與超雲談天，令她十分冇癮。當影全家福時，超蓮更扁嘴以示不滿。其後賭王知道Tim是超蓮男友後，立即上下打量他一次，才笑住與他握手。

賭王選婿：要質地好

賭王評價Tim「斯文，高大」，問他覺得Tim是否靚仔？他說：「過得去。」可及得上他靚仔？他笑說：「都好難喎！」提到揀女婿條件，賭王說：「最緊要個女同媽咪鍾意，千祈唔好似非洲黑卒卒咁，最好中國人，鬼佬就要減分喇，做男友就最緊要質地好，佢都好夠斯文，有才幹，冇錢都唔緊要。」
三姨太陳婉珍則堅稱女兒只是交朋友，問她可想女兒揀個賭王般的男友？她說：「呢個指標好難達到，係萬中無一。」
一對小情人在場內拖實手，超蓮透露男友攻讀設計，兩人拍拖幾個月。問她是否初戀，超蓮含羞答答不願講，問她在英國拍拖豈非自由得多？她說：「我一向都要做灰姑娘，唔可以出夜街，英國讀書寄宿都好嚴。」Tim則謂初相識時已略知超蓮是賭王女兒，他說：「之前知少少啦，𠵱家開始有壓力囉。」他謂準備陪賭王打網球博加分，問他超蓮有何吸引之處？Tim說：「佢對眼電到我。」
採訪：梁錦雯　攝影：陳志嵐