當年今日
關於我們

百厭偷爬騎樓 記缺點跪地主
Kenny被屈玩火阿妹自首

蘋果日報 2003/07/28 00:00


組合Boy'Z的關智斌(Kenny)小時候是百厭星,試過因為由學校的五樓爬上六樓,而被老師記缺點見家長,回家後被父親罰跪地主。Kenny亦曾被爸爸誤會在家玩火,事隔多年才知道其實是妹妹所為。
關智斌是家中唯一男丁,有兩個姊姊和一個妹妹,但Kenny的父母並沒因此特別偏心他,公平對待四名子女。
Kenny日前談到童年生活,原來他小時候十分頑皮,Kenny說:「我幾百厭㗎,記得小學要留喺學校補習,我同同學仔就由五樓嘅騎樓仔爬上六樓,點知俾阿sir發現,記咗我哋缺點。阿爸重要去學校見家長,佢返到屋企時好嬲,重罰我跪地主。」

討厭隔壁太太
Kenny表示雙親一向很民主,以前不會這樣處罰他,Kenny說:「都係多得隔籬屋個師奶,佢猛咁慫恿阿爸同阿媽好似佢咁罰啲仔女,所以我好憎佢,好彩只係罰過幾次,之後阿爸同阿媽都改變咗罰我哋嘅形式。」

買飯盒兩份食
問Kenny與姊妹相處之道,他說:「基本上我哋幾好感情,尤其妹妹細我一年,以前小學放學,我會等埋佢,兩兄妹一齊去快餐店買飯盒兩份食。」
後來妹妹轉讀下午校,有次她在家中廁所玩火燒紙巾,但其父卻誤會是Kenny的所為,最後打了Kenny一頓。
Kenny對此說:「我都心有不甘,事隔好多年,我終於喺阿爸面前翻案,阿妹亦認番係佢當年做錯,我先至申冤成功。」
採訪:比華利
empty
Kenny(右)跟組合成員Steven均以鬼馬活潑形象示人。 資料圖片
empty
Kenny小時候樣子活潑可愛。
empty
Kenny和兩個表姊一齊做花仔和花女。
empty
Kenny對音樂有濃厚興趣,曾學手風琴。