前晚菊姐喺中環雲咸街嘅上海總會請食上海菜,出席者包括陳法拉、葉翠翠、韓馬利、李國麟、惠英紅、李香琴、蕭正楠、姚子羚、阮兆祥同監製梅小青及幕後工作人員等幾十人,但陳豪同阿佘就因為分別喺香港同內地拍劇而未有現身。佢哋食到10點幾就陸續離開,見法拉唔單止扶實琴姐,而且仲用自己部七人車送埋佢老人家返屋企。至於惠英紅就好搞笑咁指住身邊嘅李國麟話:「我同奸夫一齊走呀!」然後急急腳鬆人。
身為老細嘅菊姐最後同Willy一齊離開,佢話:「今晚我負責請食飯,今晚都算好齊人o架啦!」問佢究竟會唔會原班人馬再開劇時,菊姐就話:「自己都好想,但都要問監製。農曆年之後我可能會開新劇。」法拉、葉翠翠同姚子羚更分別將飯局嘅相放上微博,大讚餸菜好味道。