沈拿係今晚（14日）谷戰唯一跑足8場嘅騎師，由最初到香港發展，每次賽馬日只得一、兩匹下風馬跑，到今日支持度大增，當中付出唔少努力同心思。

沈拿話自己爭取座騎嘅招數直接簡單，就係落力操馬，唔好以為佢嗰樣夠cool，平時一定好少說話，每朝佢都會主動游說練馬師，不論馬匹有冇賽程同狀態，佢都樂意幫手操，試過一朝早為6、7匹馬快跳，雖然忙到爆，但佢話最緊要一眾練馬師感受到自己嘅誠意同專業態度，然後先可以得到佢哋信任。

沈拿今晚賽駒中，第四場四班1800米姚本輝馬房隻「王者再現」，上場喺田草1600米後追甚勁得第6名，今場繼續由沈拿操刀，亦可以話係佢嘅「考牌馬」，因為「王者再現」係一匹「性格巨星」，喺泥地出操次次都懶到出汁，唔多肯走，但一落草地快跳就顯得精神奕奕，夠晒奇怪。

沈拿話「王者再現」陣上鍾意走外叠，如果被困馬林就唔願走，所以今晚6檔盡可能移出外叠衝刺，上季尾「王者再現」贏出同班同程時，當時鞍上人郭能亦沿途走外叠，所以沈拿騎呢匹「性格巨星」真係要考驗騎功同陣上智慧。