回復單身嘅王寶葆（春卷）今日fit到爆着比堅尼到深井一個沙灘，跟鄺芷凡為奇妙電視節目《中伏》進行拍攝，王寶葆為呢次拍攝真係好落力，下半身仲游走喺走光邊緣，今集講到女士喺沙灘被人偷影會否觸犯法例，王寶葆指有時出席公開活動時，可能有「龍友」只會局部影胸或臀部，佢話：「有藝人會介意，我反而覺得冇樣就無所謂。」佢亦明白好難以立法阻止類似事件發生。

講到自身中伏經歷，王寶葆話：「拍咗啲廣告，合約寫明只播一年，但播到今日仲有播，有好幾個廣告都係咁，有啲已經播咗八年，搵過啲經紀去追，但都冇下文。」之前原定計劃簽美國經理人公司到當地發展，但王晶提出更佳條件，所以決定簽畀對方，嚟緊主力到大陸拍戲同網劇，問到係咪要行性感？佢話：「大把晶女郎唔駛我性感，晶哥鍾意我奸，想我向呢方面發展。」不過唔識睇中文，王寶葆話想進修普通話同中文，冇擔心到大陸發展唔習慣，因為之前跟前任男友經常返大陸工作，都覺得並非想像中恐怖。