下屆特首選情看似激烈，但日日對住豬狼真係好悶。香港應科院嘅顧問余永賢教授（圖），噚日就開記者會宣佈參選，提出要以「科教興港」呢個抄中共國策嘅假大空口號。得嗰兩頁紙政綱就走去選特首，余教授話，自己冇從政經驗，但曾經係聯合國教科文組織擔任過科技政策部顧問，唔怕俾人話冇料到喎。
政綱冇料到，一講六四，更令佢現形。呢條友力撐當年中共屠城係「正確決定」，仲話當年只係冇橡膠子彈同水炮先造成傷亡。廿多年來香港人一直堅持平反六四，但呢位余教授話，好多嘢都唔係講平唔平反，正如美國歧視中國人成百年，之後先道歉，甚至英國人賣鴉片畀中國，至今都冇道歉，八方聽過唔少歪理，呢個都算低級。
講到特首選舉，余教授話自己有信心取得150個選委支持，仲口口聲聲話唔同界別選委都有人講咗支持佢，不過唔可以開名喎。今屆都未開始投票，余教授已經放話講明會爭取2017年連任，同奧巴馬睇齊咁話。如果要搵一種動物去形容余教授，八方冇乜心水，只知道呢種動物，一定係冷血囉！